2006日本 – 第五天

行程
池袋 -> 機場

交通
池袋 -> 機場: Narita Express (成田特急)

食乜野
松屋 (牛肉飯 )

詳情
– 今日天氣麻麻地咁. 天黑黑咁.
– 因為今日要預番時間搭車出機場, 所以決定今日都係留番係池袋度行到夠鐘就走.
– 又唔知今日係乜日子, 只知係節日, 池袋呢度今日會有街頭表演, 而酒店附近既公園聚集左好多人, 一落酒店, 就淨係見到人, 同平時平靜既街差好遠.

– 雖然話酒店對面就係車行既 showroom, 但黎咁多日都無行過, 今日就有時間入去行下啦.
– 咁啱今日又有F1, 所以入面己經準備好晒, 等d人入黎一齊睇車.
– 團友就睇唔到啦, 比賽緊果陣我地己經要係火車上面啦.

– 去左車站度買車飛, 順便行下個supermarket. d野又靚又多, 真係想買晒番黎呀!
– 行完出番去路面, 已經見到條街已經封左路, 同埋有唔少人係度, 準備一陣既活動.
– 我地最後衝刺, 去左tokyo hands.
– 行完出黎, 活動已經開始左. 表演緊既我估係一D日本既傳統舞蹈, 我見個個跳舞既人, 都好好笑容, 雖然有少少雨, 但都無改佢地既表演, 令到在場既人都覺得好開心咁.
– 表演緊果陣, 會有人派發是日活動既報紙, 我雖然睇唔明, 但好似呢d表演係全國性既, 即係全個日本, 好多地方都有呢d表演.
– 真係好好彩, 有機會睇到呢d表演.

– 我地見個天越來越黑, 雨又越落越大, 我地拿拿冧番酒店拎行李, 再衝去食埋臨走既lunch
– 壓軸既lunch, 去左松屋. 上次都係叫take away, 今次係第一次係鋪頭入面食. 一坐低就會俾杯水你飲, 基本上係間間日本食肆都會做既動作.- 
– 可能因為食得太趕, 好似覺得上次買外賣, 好似好食d咁.
– 不過日本松屋, 除左牛肉飯, 仲有好多其他選擇, e.g. 咖喱飯

– 好似小學作文咁, 我就係懷著 ‘依依不捨’ 既心情, 拖住d行李上火車啦.
– 呢架火車比起Skyliner新淨好多, 起碼無一陣味 (當然啦, 車飛貴咁多!!)
– 同埋, 呢加火車, 開左車一陣, 會有餐車架 (當然要俾錢先有野食啦)

– 去到機場啦, 臨尾都要係入閘後買d野.
– 係網度睇到話機場大廈入面會有間 和幸 既外賣店, 但我搵黎搵去都搵唔到呢.
– 我地係飛去日本果程機度睇果本catalogue, 見到有JAL出既杯麵, 仲諗住回程果陣買一箱番黎做手信, 點知, 原來淨係可以飛去日本果程先買到, 仲要有日本地址先收得. 所以, 最後一包麵都無買到

– 咁就完左個旅行, 咁就過左5日. 快樂既時間過得特別快, 都唔知下次幾時先有得去旅行啦.

2006日本 – 第四天

行程
池袋 -> 銀座 -> 惠比壽  -> 代宮山  -> 池袋

交通
池袋 -> 銀座: 東京地鐵
銀座 -> 新橋 : 好近啫, 行就得啦
新橋 -> 惠比壽: JR 山手線
惠比壽 -> 代宮山 : 邊行邊睇, 邊睇邊買
代宮山 -> 渋谷: 八公巴士(ハチ公バス)
渋谷 ->  新宿: JR 山手線
新宿 -> 池袋: JR 山手線

食乜野
Wendy’s 
天丼 (新宿西口)
Godiva Ice-cream

詳情
– 今日行程有變, 由原先既橫濱一日遊, 改為東京閒逛.
– 第一站係去池袋, 除左間sony陳列室同間玩具博品館之外, 其實無乜其他特別野想睇. 本來都有諗過去呢度間MUJI, 不過路程太遠太唔就腳, 結果無去到.
– 意外收獲係黎左呢度果間伊東屋總店. 呢間鋪頭其實最出名既係賣紙品. 不過對我黎講又無乜需要, 反而買左兩塊靚靚既日式和布做手信.
– 唔知今日乜野日子, 博品館門口果條路封左, 佢地仲放左幾張小朋友枱凳同玩具, 俾d小朋友係度玩.

– 尋日發現新橋原來好近銀座, 所以今日決定黎新橋呢度. 因為呢度有一座由舊新橋停車場改建而成既 ‘鐵道歷史展示室. (雖說叫停車場, 其實是以前停泊轉換火車的地方)
– 呢坐建築物其實係重新起過既, 但就參照以前既建築, 重保留左一小段鐵路係場館後方.
– 不過好多以前火車既野睇架, 包括以前火車既車箱環境
–  場館不設入場費, 但唔可以影相呀!!

– 第二站係去惠比壽. 一出車站, 就會發覺呢度應該唔係旅遊區, 計計埋埋, 應該只得我地呢兩個遊客係度.
– 車站對面有間賣便當既鋪頭, d便當既賣相好靚架. 可能呢度多住宅/商業區, 都幾多人買.
– 我地黎呢度既目的: 搵一間賣賽車野既鋪頭. 好在都幾容易搵, 樓下仲有一間賣美式玩具既鋪頭, 日本人, 真係好鍾意美國野
– 雖然我唔識, 但我都覺得呢間’車鋪’真係好多野賣囉, 睇到團友 眼定定. 同埋, 真係有唔少女仔黎買野架.
– 睇完野, 就去左隔離間wendy’s度食lunch. 真係好好好好好耐無食過wendy’s 啦.
– 可能因為真係無乜遊客黎呢度, 買野食果陣真係有少少困難. 點解一間美式快餐, 會無英文menu架.

– 我地一路向代宮山既方向行, 係日本街頭行, 真係勁舒服. 至少空氣都清新D, 陽光又好d, 條街又乾淨D, 仲靜好多添
– 呢度附近全部都係d住宅區, 所以沿路兩旁都係賣D日常生活用品既鋪頭.

– 好快就黎左我好鍾意既代宮山啦
– 呢度四周圍都好靜架, 不過唔係無人喎, 其實周圍都係d鋪頭(有d仲係名店黎架). 呢度d屋多數都係白色, 附近又好多植物, 又有唔少人係度跑步, cycling咁, 仲係覺得呢度好唔似日本咁, 似外國多d.
– 我係呢度大出血. -_-||

– 竟然俾我搵到呢度果間專門賣手巾既地方, 勁開心死我呢個毛巾婆婆呀!! 雖然我無買野(之前出左血, 無得再買野啦), 但齋睇都開心呀~!!! 呢間鋪頭外面睇, 都係唔覺眼架, 但好古色古香, 似係住既地方多過鋪頭.
– 今次去左代宮山比較遠既地方, 睇黎同出面 ‘全白’ 既代宮山又有d唔同. 呢邊熱鬧好多.
– 我地見到d好 日劇feel既野呀. 有火車閘係條路度呀!!!!!

– 搭去渋谷果架巴士仔好得意架, 細細架咁.

– 因為之前都行過渋谷啦, 今日唔行囉. 不過, 又再去新宿. -_-||
– 不過今日係去西口果邊, 唔去東口啦!
– 西口呢邊, 有francfranc, 高島屋百貨, tokyu hands等等. FrancFranc果邊, 勁多人, d書仔仲話乜野拍拖勝地, 唔係卦, 成個年宵咁熱鬧喎. 反而行下d 百貨公司同tokyu hands, 仲無咁多人.
– 去左西口果間 天丼 食 天婦羅飯, 真係又平又好味呀!!!! 諗起都好想再食呀.

– 今日臨尾一激, 去左酒店樓下間Godiva度, 買左雪糕食!!!!
– 團友仲担心食唔晒, 我都唔洗三扒兩撥就攪掂成盒.

– 聽日就日本遊最後一日, 諗起要番工, 真係乜mood都無.

2006日本 – 第三天

行程
池袋 -> 吉祥寺 -> 渋谷 -> 表參道 -> 原宿 -> 新宿 -> 池袋

交通
池袋 -> 新宿: JR 山手線
新宿 -> 吉祥寺 : JR 中央線
吉祥寺 -> 渋谷: 京王井の頭線
渋谷 -> 表參道 -> 原宿: 行完再行啦
原宿 -> 新宿: JR 山手線
新宿 ->  池袋: JR 山手線

食乜野
Sweden雪糕店 – Nissei 軟雪糕: 北海道牛奶味
日高屋 (渋谷Tokyo Hands對面)
大江戶迴轉壽司 (新宿西口)

詳情
– 今朝去左吉祥寺, 我都幾鍾意呢個地方, 有多D小鎮既氣味, 有多D純樸味咁, 無新宿, 池袋既商業味咁重. 呢度好多賣d家具日用品既店鋪, 正合我意. 仲俾我搵到好多之前做功課搵到既鋪頭, 其中一間d野仲好平好靚添. 當然我都買左少少啦. (件件貨都只係105/315yen咋喎, 好抵啫!) 林小姐d書都強烈推介吉祥寺呢度, 果然無介紹錯.
– 本來想試下個個都話好味既Satou炸牛肉球, 不過, 要排隊, 又唔知要排幾耐, 最後都無試到
– 吉祥寺另一個地方想去既就係全東京最大既muji, 點知…..佢而家裝修囉. 間間我都有去website度check, 係呢間無, 點知就撞正, 邊個叫我咁懶唔check埋

– 再到渋谷, 無計啦, 黎呢度, 都係shopping架啦. 重遊舊地, 黎番我最鍾意行既呢間 Tokyu hands, 但搵唔番果d我想買既files囉, 連隔離既picnic on picnic都玩我, 仲乜樓上兩層裝修架
– 上次我地係同一個鋪位食既美式快餐, 唔多得, 估唔到今次我地又係番同一個位置度食野, 不過今次係食拉麵. 林小姐本書又話呢間有そば食既, 點解入到去叫餐果陣佢又話無架?? 不過唔緊要啦, 呢間又平, 味道又唔差, 都無問題啦.

– 行下行下, 食杯軟雪糕先. 好香奶味, 唔只雪糕好味, 連個cone都好好味, 仲可以要朱古力味添呀.
– 今日適馮係0101既特賣日, 所以附近全都是排隊的人.
– 好多旅遊書介紹既 Three Minutes Happiness, 失望, 邊有3分鐘happy咁多, 我怕連30秒都未必有.
– 跟住都係一路行, 行, 行, 沿路都係d 鋪頭仔(入面d野都好靚好型架), 人少少, 車又唔多, 行得好舒服, 日本既空氣都清新d!!!! 吸多d先…………

–  轉個頭就去到一個好似好’上等’既地方, 表參道Hills, 黎做乜? 團友黎搵間模型鋪. 淨係話你知有間模型鋪開係IFC都夠晒型啦, 更何況係呢度.
– 跟住繼續行行行, 買買買, 痛痛痛(我條腰呀)….

– 因為時間關係, 要到新宿繼續!!!! 先去都廳既展望室,  呢度其實都幾望架, 我地係一條有自動梯既隨道不過咁向前行都行左好耐先到. 黎呢度主要係上去60樓度睇東京夜景.
– 睇完之後, 去左門口搭巴士番新宿站(因為我開始頂唔住, 要搵地方坐坐).

–  本來今晚係計劃去食sukiyaki, 但團友仲係病病地, 所以無得食, 最後去左間迴轉壽司度食野, 個menu得字無圖, 好在有實物睇樣, 所以食左落肚, 都唔知食左乜.
– 行左幾個地方, 全都是人, 新宿實在太多人, 尤其去到agnes’ b, 全是香港人, 即走…….
– 番酒店, 番去之前梗要去買消夜啦. 今次去左酒店附近既24小時營業既超級市場(Seibu), 好多野想買, 好多野想食呀……

– 聽日, 無得去橫濱, 無得去outlet啦 .

2006日本 – 第二天

行程
池袋 –> 上野 –> 秋葉原 –> 台場 –> 池袋

交通
池袋 -> 大塚: 都電荒川線(地面電車)
大塚 -> 上野: JR山手線
上野 -> 秋葉原: 行行行….
秋葉原 -> 新橋: JR山手線
新橋 -> 台場: ゆりかもめ線 (用一日票, 之後可無限次來回線內各站)
台場 -> 池袋: JR山手線

食乜野
PepperLunch (秋葉原百貨公司內, JR站隔離)
ポムの樹 (台場 aqua city內)

詳情
– 第一次搭呢D電車, 好得意, 不過, 搭左兩個站咋.

– 我地都勁啦, 人地個個都最後果站黎上野買手信, 我地要攪特式, 第一日, 第一站就黎左買手信先, 所謂無’後顧之憂’, 買完野俾人地, 可以安心自己買野!!!!
– 我黎左日本咁多次, 其實今次第一次黎上野咋. 係呀, 我一向都唔鍾意買野食做手信, 今次破晒格. 上野俾我既感覺, 係一個好乾淨既露天街市, 有d似北角架, 但整齊乾淨好多 😀

– 係上野, 最大收獲唔係去買野食做手信, 而係搵左間好多野睇既玩具店-Yamashiroya. 唔信, 你問下我團友啦! 下次唔去銀座博品館囉!
– 去左一間賣茶葉既鋪頭, 拎住個N年前買落既一個茶葉包裝袋黎買茶葉, 個鋪頭d人好似發現UFO咁既樣, ‘we嘩鬼叫’左一輪, 然後又對住我講左一大堆我唔知佢講乜既野, 就幫我搵到一包現代版既茶葉啦.
– 行行下, 竟然俾我地發現左間隱蔽既Honda門市部, 團友當然 ‘暗叫不妙’啦.

– 正所謂’妙完可以再妙’, 我地跟住’行行重行行’ 由上野步行前住秋葉原途中, 就搵到林小姐書中介紹既模型車店啦, 間鋪都幾唔顯眼架, 重要係樓上, 附近全部都係商業/住宅, 好在有地圖在手, 唔係都幾難搵.
– 去到秋葉原, 行左幾間鋪頭, 都係賣扭旦呀, 電腦野呀, 相機野呀咁啦. 呢度賣乜我諗唔洗我介紹啦. 不過點解次次黎呢度, 我地都係趕頭趕命咁既?
– Pepperlunch, 呢間係我要求encore既食店之一, 上次係’盲中中’ 咁入黎食, 食完先知原來呢間咁出名. 今次我仲係特登要黎番同一間添. 不過d野都有d唔同囉. 上次張紙係好長既, 今次變左張圓紙喎. 😀 上次因為唔知頭唔知路, 個服務員哥哥幫我燒好同整好先俾我既, 今次大個女, 要自己整啦. 😀

– 食完, 要向台場出發! 不過先先放低d野係車站locker先……
– 買左張台場一日卷, 可以無限次來回台場各站, 架車係無人駕駛既, 咁我地梗係霸第一排位坐啦!!!!!!
– 先黎到Decks Toyko Beach, 個沙灘, 比想像中細, 不過真係好乾淨, 但無乜野睇囉, 彩虹橋, 我諗夜晚睇好d, 夜d再睇過. 番商場先.

– 跟住到Palette Town, 其實我都係黎過呢度好多次架啦…. 呢度有乜睇? 有豐田車館, The Toyota History Garage, 仲有商場內既無數鋪頭啦. 團友就繼續買佢既F1野, 我就繼續買我既衫.
– 行完又搭番去Decks度食野, 順便睇下夜晚既彩虹橋.

– 今次去左食旦包飯, 點解? 因為我鍾意食囉. 呢度d旦真係好好味架. 呢餐可以講係呢個trip度比較貴果餐黎架啦. 我地呢d鍾意食平既地道野, 果d 神戶牛柳, 刺身船都唔洗預我啦!!!!

– 食完飯, 行番出去商場, 好多鋪頭都關門大吉囉, 想唔走都唔得啦. (臨走先發現呢度有間超大Agnes’ b, 但, 咁夜, closed左啦)
– 條腰好痛呀…..